Deu 9 | NdeIBE | STEP | Zwana, We Israyeli. Khathesi ususiyachapha iJodani ukuze ungene uyethathela izizwe ezinkulu ezilamandla kulawe, ezilamadolobho amakhulu alemiduli etshaya emkhathini.

Deuteronomy 9

Akungenxa yokulunga kukaIsrayeli

1 Zwana, We Israyeli. Khathesi ususiyachapha iJodani ukuze ungene uyethathela izizwe ezinkulu ezilamandla kulawe, ezilamadolobho amakhulu alemiduli etshaya emkhathini.

2 Abantu bakhona balamandla njalo bade – ngama-Anakhi. Liyakwazi konke ngabo njalo selike layizwa indumela yabo yokuthi: “Ngubani ongamelana lama-Anakhi?” 3 Kodwa qinisekani lamuhla ngoba uJehova wenu nguye ozachapha phambi kwenu njengomlilo otshisa ubhuqe. UJehova uzababhubhisa; uzabanyathela phambi kwenu. Lizabaxotsha libabhubhise masinyane, njengokuthembisa kukaJehova.

4 Ngemva kokuba uJehova uNkulunkulu wenu esebanqobile phambi kwenu, lingabozikhohlisa lisithi, “UJehova ungilethe lapha ukuba ngilithathe libe ngelami lelilizwe ngenxa yokulunga kwami.” Akunjalo, kungenxa yezono zalezizizwe okuzakwenza ukuthi uJehova azisuse phambi kwakho. 5 Akusikho ukuthi kungenxa yokulunga kwakho loba ukuziphatha ngobuntu bakho okuzakwenza ungene kulelolizwe ulithathe; kodwa kungenxa yezono zalezozizwe, uJehova wakho uzazixotsha phambi kwakho lezizizwe ukuze kugcwaliseke isifungo uJehova wakho asenza kuboyihlo, u-Abhrahama, u-Isaka kanye loJakhobe. 6 Zwisisa manje, ukuthi akungenxa yokulunga kwakho ukuthi uJehova wakho ukunika lelilizwe ukuba libe ngelakho, ngoba lina simo senu lingontamolukhuni.

Ithole legolide

7 Khumbulani lokhu njalo lingakhohlwa ukuthi lamthukuthelisa njani uJehova enkangala waze wazonda. Kusukela ngosuku elasuka ngalo eGibhithe lize lizofika lapha, belilokhu lihlamukela uJehova. 8 EHorebi lavusa ulaka lukaJehova ngalokho wazonda okokuthi wayezalibhubhisa. 9 Kwathi ekukhweleni kwami intaba ngisiyakwamukela izibhebhedu zamatshe, izibhebhedu zesivumelwano uJehova asenza lani, ngahlala entabeni okwezinsuku ezingamatshumi amane lobusuku obungamatshumi amane; angidlanga sinkwa njalo angizange nginathe amanzi. 10 UJehova uNkulunkulu wanginika izibhebhedu zamatshe ezimbili okwakulotshwe kuzo ngomunwe kaNkulunkulu. Kulezizibhebhedu kwakulotshwe yonke imilayo eyayethulwe nguJehova kini phezu kwentaba ephakathi komlilo, ngosuku lombuthano.

11 Ekupheleni kwezinsuku ezingamatshumi amane njalo lobusuku obungamatshumi amane, uJehova wangipha izibhebhedu zamatshe ezimbili, izibhebhedu zesivumelwano.

12 UJehova wangitshela wathi, “Suka lapha wehle ngokuphangisa, ngoba abantu bakho owabakhupha eGibhithe sebexhwalile. Sebephambukile masinyane kulokho engangibalaye ngakho njalo sebezibumbele isithombe.”

13 UJehova wathi kimi, “Sengibabonile lababantu, njalo bangontamolukhuni ngeqiniso!

14 Ngiyekela ukuze ngibabhubhise njalo ngesule amabizo abo ngaphansi kwamazulu. Njalo ngizakwenza ube yisizwe esilamandla futhi esikhulu kulesabo.” 15 Ngasengiphenduka ngehla entabeni yona isitsha ivutha umlilo. Kanti njalo izibhebhedu zombili zesivumelwano zazisezandleni zami. 16 Ngathi ngiyakhangela ngabona ukuthi lonile phambi kukaJehova wenu; laselizibumbele isithombe esibunjwe ngesimo sethole. Laseliphambukile masinyane lisuka endleleni uJehova eyelilaye ngayo.

17 Ngalokho ngathatha izibhebhedu zombili ezazisezandleni zami ngazisakazela phansi, zahlakazeka zaba yizicucu phambi kwenu.

18 Kanti-ke njalo ngazilahla ngawa phambi kukaJehova okwezinsuku ezingamatshumi amane njalo lobusuku obungamatshumi amane; angidlanga sinkwa njalo angizange nginathe amanzi, ngenxa yezono zonke elaselizidalile, lisenza okubi emehlweni kaJehova njalo lamthukuthelisa waze wazonda. 19 Ngesaba intukuthelo lolaka lukaJehova, ngoba wayezonde kangangokuba wayengalibhubhisa. Kodwa-ke futhi uJehova wangilalela. 20 UJehova wamthukuthelela u-Aroni kangangokuba wayengamtshabalalisa, kodwa-ke ngaleso sikhathi laye u-Aroni ngamkhulekela. 21 Ngabuye ngathatha into yenu yesono, ithole leli elalilibumbile, ngalitshisa emlilweni. Ngasengilichoboza njalo ngalichola laba yimpuphu ecoleke njengothuli ngaluhaza loluthuli esifuleni esigeleza entabeni.

22 Laphinda njalo lamthukuthelisa uJehova eThabhera, laseMasa kanye laseKhibhurothi Hathava.

23 Kanti uJehova wathi elisusa eKhadeshi Bhaneya, wathi, “Qhubekani njalo liyethatha ilizwe engilinike lona.” Kodwa lahlamukela umlayo kaJehova uNkulunkulu wenu. Alizange limethembe loba ukumlalela. 24 Belivele limhlamukela uJehova kusukela ngiqalisa ukulazi.

25 Ngazilahla ngawa phambi kukaJehova okwezinsuku ezingamatshumi amane kanye lobusuku obungamatshumi amane ngoba uJehova wayethe uzalibhubhisa. 26 Ngakhuleka njalo kuJehova ngathi, “O! Jehova Wobukhosi, ungabhubhisi abantu bakho, ilifa lakho owalihlenga ngamandla akho amakhulu wabakhipha eGibhithe ngesandla sakho esilamandla. 27 Khumbula izinceku zakho u-Abhrahama, u-Isaka kanye loJakhobe. Xola ebuqholweni balababantu, ebubini lasezonweni zabo. 28 Nxa kungenjalo ilizwe owasisusa kilo lizakuthi, ‘Ngoba uJehova wehluleka ukubangenisa elizweni ayebathembise lona, njalo langenxa yokuthi wayebazonda, wabakhupha ukuze bayefela enkangala?

29 Kodwa ngabantu bakho, abayilifa lakho owalikhupha ngamandla akho amakhulu langengalo yakho eyeluliweyo.”